والله غريبة
واحد مخلوع فاسد ومفسد وناجح بالتزوير ومش قابل حتى النقد واللى ينتقده بكلمة يقوله استب ولا كلمة ...
ده مش مبارك على فكره ده نائب الحزب الوطنى اللى فى دايرتنا
تخيلوا حتة نائب !!!
وليل نهار خاوتينا بقى انهم اشراف وايديهم طول عمرها من فوق واحنا ايدينا اللى من تحت وانهم ياما قدمولنا ضحك وجد ولعب ومصالح
بس طبعا كل ده كان للاعيان من عمد ومشايخ لاننا زي ما كلنا عارفين الحزب المنحل كان بيختار نوابه في الصعيد بناء على السمعه الحلوة والشعبية وطبعا دي كان بياخدها من العمد والمشايخ والمطبلاتيه وكلنا عارفين طبعا ان مجرد اختيار الحزب لاى حد ينزل على قوائمه ده معناه انه نجح بامتياز من غير كلام وطبعا بطريقة كلنا عارفينها يعني حد عمره شاف الجمل في الصعيد برك اقصد سقط في الانتخابات .
يبقى ولد العمدة يا ناس يتوظف في الكهرباء والبترول والغلبان يشتغل باليومية ماجور وتكلمهم دلوقت بعد الثورة ما كشفتهم يقولولك ده احنا كنا بنعاني من الفساد اكتر منك !
تصدقوا باين على عربياتكم وفللكم واراضيكم اللى بتغطس وسطيها الشمس والخيل يجرى فيها ربع ساعة ما يجبش اخرها ونص الدايره اللى مشغلنهم اجريه كل اللى بياخدوه منكم كام اردب في اخر السنة على قلمين في اليوم والليل والايد قصيره والعين بصيرة والناس صبرت وكتمت غلب .
اقطاع والله يا اخوانا وكله سرقة وسفلحة .
الغربية والاغرب بقى انهم فاكرين نفسهم شرفاء
يعني اللى قعد طول عمره هو واهله غاطس في بير مليان زبدة وعسل هيطلع من البير ده من غير ما يتلاص ولا ياخد له لحستين عسل ولا قالب زبدة .
خلينا كده نكون واضحين وصرحاء ونتوب ونقول اسفين وفي الاخر الصندوق بردوا هيوقعكم ده لو فضل مجلسنا الموقر والحكومة المبجله رافضه تحرم هؤلاء الفلول من المشاركة السياسية كام سنة لقدام .
انما نلف وندور ونحاول نضحك على الناس ونستغل طيبتهم ونلم حوالينا شوية مطبالتيه يزفونا ويهللوا لما يشوفونا
لا كده عيب والله وما يصحش
....
الكلام ده تعقيب على حوار دار بيني وبين نائب الوطنى في دايرتنا اللى رفض انى انتقده واتهمنى انى ماجور ومريض نفسى لمجرد انى انتقدته وكان فاضل بس يقول عليه انى عميل وخاين وهى دي الديمقراطية لا وهددني بشوية بلطجية اللى هبوا في وشى زي الكلاب اللى بتدافع عن سيدها .
تخيلوا بقى ان ده فكرهم ودى حياتهم عشان بس الناس اللى رافضة اننا نطالب بمنعهم وعائلاتهم من الترشح للانتخابات لكام سنة لقدام لان الناس دي فكرها زي ما هو وعمره ما هيتغير ولسه للاسف عايشين في زمن قبل الثورة وانهم قادرين وايديهم طايله ولسانهم بردو لسه طويل .
يا ريت الناس تسمع وتصدق ان الناس دي مفيش فايدة فيهم ومكانهم الطبيعي واحد من اتنين اما سجن طره او بيوتهم ما هو مش معقوله واحد طول عمره فاسد هيصلح من نفسه فجاة كده ولوجه الله .
لذلك لابد من وضع قانون يحرم هؤلاء المزورين الفاسدين وعائلاتهم من المشاركة السياسية على الاقل لخمس سنوات قادمة على الاقل لدورهم المفضوح في افساد الحياة السياسية والحزبية في مصر قبل الثورة واعتمادهم على الرشاوى والتزوير في الوصول للبرلمان فلا يصح ان نسقط الراس بينما يظل باقى الجسد كما انهم ركن اساسى في نظام اسقطته الثورة .
