هنقول ايه
اللى فاهم بس يفهمنى
قالوا انهم مش قاعدين
من اول يوم قالوا ماشيين
فكرونا بالراجل المخلوع
بتاع الكفن مالوش جيوب
لما قال في اول خطاب هما ياعالم دورتين
وكل ما يوم يعدي نحس انهم
قاعدين قاعدين قاعدين
امن البلد والجاسوسية
وشوية فتنة طائفية
على حبة مفيش سولار
ولا بقى فول ولا فيه طعميه
نعلنها احكام عرفية
هبه مفيش لا تظاهر ولا كلمة نقولها
ويقولنا بنجمى الثورة
من اعدائها
وانتوا اعدائها !!
بس يا ترى الشعب هيفضل
ساكت ولا فاهم بيفكر
حكم العسكر ده يا اخوانا
مبقاش له في الكون ده مكان
ولا من ورا ولا من قدام
ولا من فوق ولا تحت كمان
حكم العسكر يا جدعان
خلاص يا زمان
مش هنزيد ونقول ونعيد
ونقول اقعد يقولنا امين
هو احنا بننحت في الصخر
فاكرينا هنفضل ساكتين
طيب خليهم بس يجربوا
طيب يتجراوا
وهيلاقونا امم واقفين
نسيوا بسرعه الملايين ا
للى هتفت واللى جريت
واللى شالت كفنها في ايدها وصرخت
وخرجت تصرخ يا ظالمين
طيب يتجراوا
واحنا نشوف
هو اللى اخوه مات ولا صاحبه
راح يسكت يعني على دمه
ولا هيصرخ صوته من تاني
ويورى العالم عنوانه
ويسمع اللى بيدور على لقمة عيش ولا انبوبة
ولا همه حرية مين ولا يعرفوا حتى الدواوين
والوزارات اللى بتتوزع شوية شمال وشوية يمين
ان العيش اللى بياكله
مربوط في نهايته بنظام
اما نضيف او اما ظريف او اما جبان
طيب يتجراوا ولا يجربوا
ده احنا ياعالم زقنا الويل
لسه كمان هنقول هنجرب
نشكي لمين ونروح على فين
بقى صوتنا يروح في صراخ وعويل
وانتوا فاكرينا عايشين
وتقولونا كنا عارفين
طيب كنتوا فين
قولوا يا اخوانا الشهما
ده احنا يا ناس كنا ميتين
ومدفونين في الهم لروسنا
وشايلين طين
اللى معاه ست عيال وبياخد ويا دوب خمسين
بالجنية مش الالف
ده في الشهر مش في يومين
واللى عياله مصروفها
في اليوم الفين
بقى ده عدل !
واللى حبيبته منتظراه يرجع بس بدبلتين
يرجع لها ميت
واكل نصه السمك مات غرقان
كان رايح يبعد طفشان
لا ده كفاية عليكم كتير
ستين سنة
دول ييجوا سبعين
وتقولنا تقدمية
نصبح نلاقيها ملوخية
شايطة الطشة مع التقلية
ويا عيني عليهم وعليه
خدوا بالكم ده احنا واعيين
واوعوا تجربوا
اصلنا احنا كلنا شفنا حكم العسكر
زي الطين
اسود ممكن فيه الخير وممكن يبقى جحور تعابين
تلهس في لحوم الغلابة
وتعض الاحياء والموتي
وتشيلنا كلنا طين
ليست هناك تعليقات:
إرسال تعليق