والله زمن

ضحكنا وبكينا
فرحنا ومشينا
نسينا حلمنا دوار
على حافة القبر
واقف ينتظر شيال
ويقول لنا شيلوا
شيلوا الالم من القلب
اصل اللى قال ياما قال
قال اننا نفضل نجر دوم في الصخر
نكتب كلام على البحر
وقلوبنا دايما حجر
قال اننا نفضل
نطاطى ونبوس جزم
والحر ما يطاطى
طيب اشهدى انتى
هو كنتى فين انتى
ده انا كنت دوارك
وحبيبك ودارك
سعدك وبستانك
طيب قولى كلمت حق
سكتت ولا نطقت
وتقولى عقبالك
تخرس ما تتكلمش
هو الكلام يا بني
كان ميته دوا للهم
يبقى السكوت احسن
والحر بيطاطى
وصحيت على صوتها
يصرخ يهز الكون
كلمة ورا كلمة
مكتوبة في الاساطير
قال شعبنا والله
بقاله كلمة وصوت
يقولوا عليه اخرس
ينطق بعلو الصوت
يقوله ده اتجنن
يقولوا ما اتجننش
بقى واقف العالم
احمر اخضر ازرق اسود
كله بقى بهتان
والمظلومين شجعان
ادى يا عالم شعبى
اللى افتكرتوه جبان
طلع النهار وصرخ
ايوة انا بتالم
اسكت ولا امشى
اموت واتكلم
واصرخ بعلو الصوت
ارحل يا متعلم
متعلمين على القهر
والسجن للمظاليم
والقتل طبعا اداه
للى يقول الاه
او يكتب المواويل
او يلعن الظرف اللى خلاه
يلبس في يوم طرحه
وشعره شاب
ولا عمره شاف
على شوه يوم فرحه
خرجت ملايين البشر
جره ورا جره
تجرجر الزمن اللى راح
ولا عمره استنى
تنحت صخور السجون
وتهد في العواميد
وننضرب بالنار
يقولوا لنا يومكم عيد
والضرب في المليان
في اليوم ييجي مية شهيد
ويبتسم فرحان
طيب يا بني ده انت ميت
يقولنا انسان
ما نا عشت عمرى كلب
يرضيكم اموت جبان
نقوله طيب اسكت ونشيله في عنينا
نرفع عيونا للسماء
ونبوس ايادينا
ونقول يارب رجع
بلدنا يوم لينا
يرضيك يارب العباد
نعيش حياتنا كده
مقطوعه ايادينا
والله زمان يا بلد
ييجي من شهور خمسه
رافعنا اسمك فوق
فوق منبع الخسه
وضربنا بيكي المثل
قصه ورا قصه
ما انتى الامل والعمل
والقصة والمواويل
والحلم واتوصى